حاولت تنتحر قبل كدة؟

شاب جامعي في بداية حياته وجدوه منتحر في شقة واحد صاحبه

بنت شابة انتحرت،بيقولوا علشان أهلها فقراء و مش عارفة تساعدهم

شاب تاني رمي نفسه في النيل. وحوادث زي ديه بنقراها في الجرايد كل فترة.بنتكلم فيها شوية و بعدين بننساها

الانتحار حاجة من الحاجات اللي عيب ومايصحش نتكلم فيها في بلدنا.دايما يقولوا انتحار آيه؟!الحاجات ديه بتحصل في بلاد برة مش عندنا هنا.وبقت كل فكرتنا عن الانتحار سعاد حسني أو ماجدة و هي بتبص للنيل و بتفكير ترمي نفسها و فجأة يظهر البطل_غالبا عماد حمدي أو شكري سرحان_و ينقذها.لكن آيه أسباب الانتحار ولا الأفكار ديه سببها آيه؟وهو اللي تجيلوا الأفكار ديه لازم يبقي مجنون ولا آيه؟
مع أن الأسئلة ديه ممكن تكون بتراود كتير مننا لكن محدش يعرف اجابتها و محدش بيسأل
ديه مقابلات حقيقية مع ناس حاولت الانتحار قبل كدة هحاول من خلالها اعرف من تجربتهم إجابة عن أسئلتي

المقابلة الأولى
عندك كام سنة؟
20 سنة

بتتدرسي ولا بتشتغلي؟
انا طالبة في الجامعة.

طيب نتدخل في موضوعنا،آمتي ابتديتي تفكري في الانتحار؟
هو فكرة الموت نفسها فضلت مسيطرة عليا فترة ولسة بفكر فيها لغاية دلوقتي.بس فكرة الانتحار نفسها لما كان عندي 17 سنة تقريبا

ليه بدأتي تفكري في الانتحار في الوقت ده بالذات؟
بوصي هو مفيش حاجة معينة حصلت فبعدها علطول فكرت في الموضوع ده.هي زي ما تقولي كدة تراكمات

تراكمات أيه؟
تراكمات إحباط من المدرسة و البيت كدة يعني

يعني خناقات مع مامتك و ضغط الامتحانات؟
لأ الحكاية مش كدة بالظبط.هي الفكرة بتجيلك مرة وانتي متضايقة و بعدين تطنيشيها بس بتفضل موجودة في دماغك ومع كل مشكلة أو خناقة أو أزمة أو حتى لو حد قلك كلمة تضايقك تفضل الفكرة تتضح لغاية لما يجي الوقت اللي ما بتبقيش بتفكري غير فيها و هي الحل الوحيد اللي قدامك لكل مشاكلك.زي ما يكون حد مستخبي و مستني الوقت اللي يطلع يهجم عليكي فيه.ولما بتهجم عليكي الفكرة ديه ما تشوفيش غيرها

طيب لما وصلتي لنقطة ان الفكرة ديه سيطرت عليكي،عملتي ايه؟
أنا كان بقالي كام يوم مكتئبة فطلبت من مامتي تديني دواء للاكتئاب
طبعا مرضيتش في الأول خالص بس أنا اعدت اعيطلها و اقولها أننا أعصابي تعبانة من الامتحانات.فديتني الشريط و قاليتلي خدي حبايا واحدة.اخدت واحدة اعدت شويا مالقيتش نفسي استريحت.اصل أنا كنت فاكرة إن أنا أول لما اخد دواء الاكتئاب كل الزعل هيروح. لقيت نفسي لسة متضايقة.رحت واخدة واحدة تانية،زي ما يكون مسكن صداع.وفضلت كدة لغاية لما الشريط خلص.هو الشريط مكنش كامل بس بعد ما خلص أنا فجأة خفت.خصوصا إن أنا كنت بدأت أدوخ و ضربات قلبي تبقي سريعة.أعدت أعيط شويا مش عارفة اعمل آيه.من 10 دقائق بس كنت فعلا عايزة اروح أي مكان غير اللي أنا فيه دلوقتي حتي لو ده معناه أنى أموت،طيب ليه فجأة خفت؟!بعد شوية عياط رحت قلت لماما

كان رد فعلها ايه؟
اتخضت طبعا.وزعئتلي شويا و كلمت الدكتور قالها أن أنا مش هيجرالي حاجة بس ممكن أدوخ شويا أو أنام كتير أو كدة

و بعد كدة اتكلمت معاكي في حاجة؟
لأ

طيب و بعدها مفكرتيش تعملي كدة تاني؟
بصراحة لأ.يعني أنا مريت بضغوط كتير بعد كدة يس محاولتش اعمل كدة تاني.

يعني ايه اللي خلاكي تقولي لمامتك او متخديش شريط تاني؟
معرفش.بيتهايئلي الخوف اللي حاسيت بيه ساعتها.ومتسئلنيش خفت من آيه بالظبط علشان بجد معرفش

ماحستييش إن اللي بتعمليه ده حرام؟
بعد كدة حسيت إن ده حرام فعلا.و إن مش المفروض اعمل كدة.بس في لحظتها مش بتفكري،بتبقي في حالة مش شايفة حاجة قدامك و مش بتفكري بوعي أو حتي بطريقة شبه منطقية

تفتكري موضوع الانتحار ده نسبته زادت؟
آه.أنا حاسة كدة أوى.صحيح إحنا عمرنا ما كان عندنا إحصائيات واضحة بس الحوادث اللي في الجرايد زادت فأكيد بقي في حالات اكتر بس مبنعرفش عنها حاجة

طب زادت ليه؟
من رأي في حالة إحباط عام في البلد.إحنا جيلنا شايف أهاليهم مقهوريين سياسيا،اجتماعيا و اقتصاديا.واللي مش مقهوريين ما يعرفوش عيالهم من طحنة الشغل.والأهل المحبطين بيخلفوا أولاد محبطين.ده غير أسباب تانية كتير


المقابلة الثانية

عندك كام سنة؟
21 سنة
بتتدرسي ولا بتشتغلي؟
بدرس و بشتغل

أمتي ابتديتي تفكري في موضوع الانتحار ده؟
وأنا في ثانية ثانوي

ليه الوقت ده بالذات؟
يعني كنت بعاني من ضغوطات كتير

زي آيه؟المذاكرة مثلا؟
آه.ديه حاجة من الحاجات.انا كنت عايزة ادخل كلية إعلام فكنت عايزة أجيب درجات عالية و كنت خايفة أوى ما جيبش الدرجات اللي تتدخلني إعلام.ده غير إن أنا كان عندي مشاكل مع أهلي

يعني خناقات مع اهلك و كدة؟
مش بالظبط يعني. كان في مشاكل كبيرة أوى ده غير أننا وقتها اتحجبت

هم اهلك ضغطوا عليكي علشان تتحجبي؟
لأ خالص. بالعكس أنا اتكلمت مع مامتي في الموضوع قبل ما اتحجب و هي ماكنتش مشجعة الفكرة و أنا اتحجبت ضد إرادتها

ليه اتحجبتي في الوقت ده بالذات،وكان عن اقتناع؟
هي ملهاش وقت معين هو أنا حاسيت إننا قريبة من ربنا و عايزة اعمل كدة و كنت مقتنعة أوى

امال آيه المشكلة؟
مامتي ماكنتش موافقة خالص.أنا كنت اتكلمت معاها في الموضوع بس هي مكنتش بتاخد كلامي جد.و أنا خرجت في يوم و رجعت محجبة وده جننها.علشان أنا عملت حاجة ضد إرادتها فكأم الموضوع ده ضايقها جدا.مامتي كانت دايما بتساندني حتي لو كنت بعمل حاجة مش عجباها و ديه كانت أول مرة تعمل معايا كدة

و ده سببلك مشكلة كبيرة؟
آه.لأنها مش بس wasn’t supportive مامتي قاطعتني.بقيت مابتكلمنيش خالص و كانت عايزاني اقلع الحجاب و أنا ماكنتش راضية طبعا

ليه كان ده موقفها؟
هي كانت شايفة ان اللي أنا بعملوا ده غلط و إن رضي الأهل مهم و كدة.و ده كان بيشكل ضغط غريب علشان انتي مش متخيلة يعني آيه اهلك يقرروا انهم غضبانين عليكي

هو انتي علاقتك بيها قبل كدة كانت كويسة؟
آه.كانت كويسة جدا. ده كانت وقت صعب أوى بالنسبة لي.المذاكرة و الأهل

و الحجاب كمان؟
لأ.الحجاب ماكنش مشكلة بالنسبة لي.بس أنا كنت مضغوطة أوى و حاسة أننا مش عارفة اعمل آيه

طب ماكنتيش بتتكلمي مع أصحابك؟
بصي أنا كان عندي أصحاب بس في حاجات معينة ممكن تتكلمي فيها بعدين لكن في ساعتها صعب.ده غير أننا مكنتش عارفة أقول لاصحابي آيه.يعني مش عارفة أقولهم ازاي إن مامتي مش موافقة علي حجابي
كنت تعبانة أوى و بأنام كل يوم معيطة.وكنا بنتخانق كتير أنا و مامتي.ده غير ان إحنا كمان في الوقت ده كان عندنا مشاكل مالية.كنت مخنوقة أوى و أنا و مامتي كنا مش بنتكلم خالص ولو احتكينا ببعض كانت بتبقي خناقة كبيرة أوى.بس أنا ماكنتش بفكر بالظبط أننا عايزة أموت نفسي

طب عملتي ايه؟
بصي أنا جيبت سكينة و حاولت انتحر

يعني عملتي ايه بالظبط؟
أنا مش فاكرة أوى بس كنت عايزة أؤذي نفسي.و ماكنتش بفكر بوضوح خالص و مفيش حاجة تهمني

يعني أنتي مش فاكرة خالص انتي ساعتها عملتي ايه بالظبط؟
لأ.انا فاكرة أننا لقيت نفسي فجأة ماسكة السكينة.والموضوع ده حصل مرتين

حد من اهلك اخد باله؟
لأ محدش اخد باله خالص.بعد كدة الموضوع عدي و أنا ابتديت اهدي

انا عايزة اعرف الموضوع عدي ازاي؟ بعد مامسكتي السكينة آيه اللي خلاكي ماتعمليش حاجة؟
تاني مرة مسكت فيها السكينة حسيت أنها بجد.و اننا خلاص هموت نفسي.و أنا ماكنتش بفكر خالص.و كنت حاسة أننا مخنوقة أوى ومش عارفة اعمل آيه و مش شايفة حل.فجأة حسيت أننا خفت.آيه اللي أنا بعمله ده،أنا ماسكة السكينة و هاموت نفسي؟
عارفة أنا حاسيت إن الكلام اللي بيقولوا في الأفلام عن الانتحار ده كله هتش.أنتي مش بتبقي ساعتها بتفكري انك تموتي نفسك و مش بتبقي مدركة.أنا معرفش آيه اللي حصل وقتها بس أنا في لحظتها خفت

الخوف اللي حاسيتي به ساعتها هو اللي خلاكي ماتعمليش كدة تاني؟
بعد كدة لما ادركت أنا بعمل آيه بدأت اعقلها.بس كان ممكن ده ميحصلش،كان ممكن ماتجيليش اللحظة اللي أدرك فيها أنا بعمل آيه.كان ممكن اكمل.يعني أنا بعد كدة اعدت أقول لنفسي آيه الهبل ده،يعني أنا اتحجبت علشان ارجع اعمل كدة.بس أنا بصراحة مقدرش أقولك إن أنا ساعتها افتكرت ربنا ولا كنت بفكر أصلا

بس أنتي بعد كدة حتي لما مريتي بضغوط مفكرتيش في الموضوع ده تاني؟
لأخالص

أنتي اتكلمتي مع حد في الموضوع ده؟
لأ.أنتي أول واحدة أتكلم معاها
ليه،علشان محدش سألك؟
محدش سألني و كمان الموضوع خاص أوى و محدش بيحب يحكي عن أوقات ضعفه.يعني أنا عامة من الشخصيات الجريئة بس ده مش سهل إن حد يتكلم فيه

محسيتيش انك عايزة تتكلمي في الموضوع ده؟
لأ

طيب ما حسيتيش انك مرتاحة اكتر لما عرفتي إن في حد فكر في الموضوع ده غيرك؟
مش مرتاحة بس حاسيت انك لازم تكتبي في الموضوع ده علشان أنا مش عايزة حد يمر بالموضوع ده

حسيتي انك غريبة علشان جاتلك الافكار ديه؟
آه،حسيت أننا غريبة

تفتكري لو حد تاني مكانك كان هيعمل كدة؟
بيتهايئلي في المجتمع اللي إحنا فيه،آه.وكان ممكن يجرالها حاجة.أنا اعرف بنات كتير رفض أهاليهم للحجاب عملهم مشاكل نفسية

دلوقتي لما بتفكري في الموضوع بستغربي انك عملتي حاجة زي كدة؟
آه.ساعات بحش إن ديه مش أنا.يعني لو أي حد يعرفني دلوقتي حكتلوا هيستغرب أوى

حاسة لو حد بيمر بظروف صعبة و قرأ المقالة ديه و عرف تجربتك وان أنتي جاتلك الأفكار ديه و عديتي من الأزمة بتاعتك،ده هيساعده؟
آه،علشان كدة أنا باحكيلك.أنا حاسة إن أنا لما أتكلم في الموضوع ده هيساعدني و هيساعد الآخرين