ياريت كل واحدة تخليها في حالها

المواقف التالية هي مواقف حقيقية أنا عشتها أو حد من أصحابي أو اتحكلنا مواقف شبيهة بها. أنا بعتذر لو حد حس بالإهانة من المواقف ديه بس هو ده هو الواقع اللي أحنا عيشينوا



الموقف الاول
بنتين واقفين في الشارع بعد يوم طويل في الجامعة بيخدوا تاكسي علشان يروحواعربية قربت منهم فيها اتنين ستات كبار محجبات و وقفت
السيدة:السلام عليكم
البنت الاولي:وعليكم السلام
السيدة:انتوا مسلمين؟
البنت الاولي:اه الحمد لله
السيدة:طيب خدي دول يا بنتي، واحد ليكي وواحد ليها و ربنا يهدي الناس جميعا
وتديها شريطين واحد شريط قرأن و واحد لعمرو خالد.من الواضح انها كانت شرايط عندها في العربية
البنت الثانية: يعني هو حضرتك مش عايزاهم؟
السيدة:لأ. ومشيت بالعربية
البنت الثانية:يعني انا عايزة افهم هو فيه ايه في شكلنا يخليها تستنتج ان احنا عمرنا ما سمعنا شريط قران و لا عندنا منها في البيت يعني؟!
البنت الاولي:يا ستي عادي كتر خيرها
البنت الثانية:لأ،اصل مين عينها تشوف مين اللي محتاج هداية و تديلوا شرايط في الشارع
البنت الاولي:ماتخديش الموضوع بحساسية كدة.هي عايزة لنا الخير مش اكتر.خلاص بقي



الموقف الثاني
بنتين قاعدين يتكلموا مع بعضهم
البنت الاولي:شوفتي البنت اللي كانوا بيتكلموا عليها امبارح و بيقولوا عليها زي القمر و وشها تحفة؟
البنت الثانية:اه شفتها
البنت الاولي:ايه حلوة بقي زي ما بيقولوا؟
البنت الثانية:عادي يعني محجبة
البنت الاولي:ايوة،يعني ايه محجبة؟حلوة ولا لأ؟
البنت الثانية: مش عارفة.يا بنتي محجبة ما هو كلهم شبه بعض. دماغك بقي


الموقف الثالث
تلات بنات واقفين في الشارع متشيكين علشان كانوا في عيد ميلاد.كل شوية عربية تعدي وتزمر او واحد يطلع راسه من العربية و يقول بصوت جهوري "ايه يا موززززة!!!".يعني موقف عادي بنشوفوا كل يوم.وقفت عربية قدامهم فيها ولد بذقن طويلة و جلبية و طقية وقال لوحدة فيهم: خدى يا اختي
و بيديها كتيبات عن الحجاب و هو مش بيبصلهم. البنت اتخطت و قالت له:ايه ده؟
قلها وهو برده مش بيبصلها:خدي بس يا اختي.البنت اخدتهم وهو مشي بالعربية
البنت قالت لصحابها:يعني لو هو مبصلناش عرف منين ان شكلنا محتاج الكتيبات ديه


الموقف الرابع
واحدة بنت عندها 20 سنة واقفة قدام المراية بتظبط الحجاب علشان هتخرج هي و تلاتة من اصحابها
واحدة صحبتها قالتلها:بصراحة شكلك من غير الحجاب كان احلي بكتير
البنت المحجبة تعجبت لان مفيش مناسبة للتعليق ده و قالتلها:بس ناس كتير قالتلي ان شكلي كدة احلي
صحبتها:لأ طبعا.ده انتي شعرك اللي كان مديكي منظر
البنت المحجبة بصتلها باستغراب اكتر و قالتلها:عامة انا مستريحة كدة
وقفلت الموضوع علشان ما تتفرسش اكتر من كدة


الموقف الخامس
"الفتاة الاولي"نزلت من بيتها علشان عندها درس. ما فيش حد يوصلها فللأسف هتاخد مواصلات.المهم لبست بنطلون واسع و بلوفر بكم علشان مش طلباها تسمعلها كلمتين ملهومش لازمة
نزلت و برضه مفيش فايدة كل ما يعدي واحد علي عجلة ولا سواق عربية نقل لازم يقولها "ايه يا عسسسسل".فضلت ماشية في حالها فجأة عربية قربت منها فيها واحدة محجبة وقالتلها:السلام عليكم
الفتاة الاولي:وعليكم السلام
الفتاة الثانية:انا شايفاكي من اول الشارع.بالله عليكي ابقي البسي حاجة تانية غير ديه علشان ما تسمعيش كلمة ملهاش لازمة من أي حد.انت اجمل من كدة
الفتاة الاولي أتفجئت واحمرت و تمتمت شكرا
مشيت الفتاة الثانية بعربيتها وعلي وجهها ابتسامة عريضة لانها راضية عن نفسها لانها عملت حاجة كويسة في يومها.اما الفتاة الاولي فوقفت متلخبطة ومكسوفة و عمالة تبوص علي لبسها مش عارفة تروح تغير هدومها ولا تعمل ايه


الموقف السادس
تلات بنات قاعدين واحدة منهم بصيت حواليها وبعدين قالت لصحابها:انا مش عارفة البنات لابسين كدة ازاي؟! وماشيين بشعرهم ولبسهم ده! بجد حاجة تستفز أي حد.
الفتاة الثانية:عادي يعني.
الفتاة الاولي:عادي ازاي ده انا كل ما افتكر نفسي قبل ما اتحجب استغرب انا ازاي كنت باخرج من غير حجاب و استغرب البنات التانية.
الفتاة التالتة:ربنا يهدي.
الفتاة الاولي بصت حواليها مرة كمان باشمئزاز و كملت اكل.


الموقف السابع
البنت الاولي:انا من ساعة ما اتحجبت وانا مش لائية نفسي مع اصحابي.
البنت الثانية:اه صحيح.انا مبقيتش اشوفك واقفة معاهم خالص.ليه كدة؟
البنت الاولي:اولا انا حاسة انهم اتغيروا من نحيتي.ده غير ان انا مبقيتش بحب خروجاتهم ولا لاناس اللي بيعدوا معاهم و بعدين بقيت كل ما افتح معاهم موضوع الحجاب يمطوا شفايفهم و يبوصوا لبعض و يغيروا الموضوع
البنت الثانية:خلاص بقي ماتضيقيش نفسك


الموقف الثامن
البنت الاولي(بتتكلم في التيليفون) :خلاص طيب.يلا باي باي
كالعادة مش هتخرج معانا
البنت الثانية:علي فكرة "هي"بقت متغيرة معانا اوى من ساعت ما اتحجبت.ما بقيتش بتخرج معانا زي الاول
البنت التالتة:اه ده صحيح.ده غير هن كل تعد معانا مفيش موضوع تتكلم فيه غير الحجاب
البنت الاولي:خلاص بقي هي حرة هنعملها ايه

الموقف التاسع
سيدة شابة وقفت تشترى لحمة.هي حاسة ان اللحمة شكلها غريب بس الراجل اللي بيبعها مصمم انها حاجة بريمو.فجأة لقت واحدة منقبة عمالة تغمزلها و تلف حواليها و تقولها اوعي تخديها.فقالت للراجل شكرا و بعدت شوية.قربت المنقبة و قالتلها:اوعي تشتري من اللحمة ديه.اصل انا جربتها قبل كدة .انتي شكلك متزوجة جديد صح؟
السيدة الثانية:اه فعلا.كويس انك قولتيلي.ده انا برضه لسة جايبة نوع لحمة وحش اوي و لو كنت عملت كدة تاني كان جوزي قتلني
وقفوا يتكلموا يضحكوا و اخدوا نمر تيليفونات بعض .بس الكانت مستغربة اوي هي ماتعودتش من المنقبات غير النظرات الغريبة لدرجة انها بقت مش بتحبهم كدة و خلاص.اول مرة تقابل واحدة منقبة تحس انها بجد ممكن تبقي صحبتها

الموقف العاشر
اربع بنات واقفين قدام مطعم معروف مستنين ترابيزة تفضي.شكلهم حلو هوي و لابسين اخر موضة.واحدة منهم فجأة قالت:ايه ده؟! بصوا شلة الغربان اللي جاية علينا!تقصد خمس بنات منقبات.اصحابها وقعوا من الضحك.واحدة صحبتها ردت عليها و قالتلها:يخربيتيك عليكي تعليقات و كملت ضحك

واحدة من البنات المنقبات شافت اللي لابسين لبس ضيق وبيضحكوا بصوت عالي في وسط الشارع.بصيتلهم باشمئزاز و قالت لاصحابها:يعني ايه المنظر ده؟! اصحابها بصوا وقالولها ان عندها حق



من الممكن جدا ان أي حد بيقرا المواقف ديه يشوف نفسه فيها ويلاقي نفسه في شخصية من الشخصيات ديه.من الممكن يكون عاش مواقف شبيهة بها او سمع عن حاجة زي كدة
انا مش بتبني أي من وجهات النظر اللي موجودة في المواقف ديه.وهدفي الاساسي من سرد المواقف ديه مش اني اقول وجهة نظري اصلا بس انا عايزة اسئل سؤال،هو احنا بقينا كدة ليه؟
مفيش حد فينا مستحمل التاني ولا بيحترم حرية الاخر و اختياراته.كلنا بنقيس اخلاق الناس التانية بمعاييرنا احنا،مع ان لكل شخص معايير مختلفة
كلنا بنفسن من بعض..ومفيش حد فينا بيسهل الحياة علي التاني بالطريقة ديه.
هل ده بسبب ان احنا اتعودنا نتكلم علي الناس و نتريء عليهم؟
هل لاننا فاضيين وديه حاجة بتسلينا؟
ولا السبب ان كل حد فينا متخيل ان التاني سبب تعاسته؟وهي شماعة بنعلق عليها مشاكلنا. هل هو ده السبب؟!يعني الحل ان كلنا نبقي زي بعض،للدرجة ديه مش قادرين نستحمل اختلافتنا
انا مش بقول ان كل الناس كدة انا بس بقول ان فيه النماذج ديه في المجتمع.والموضوع بيزيد والحساسية اللي ما بينا بتزيد.احنا مش قادرين نتقبل بعض وكل جماعة بتنغلق علي نفسها
الفكرة ان الموضوع ده لو زاد هيؤدي الي عنصرية.وعلشان ده مايحصلش ياريت كل واحد يخلي باله من تصرفاته و يحط نفسه مكان الاخر
وياريت نحاول نتقبل بعض باختلافاتنا و نحترمها.لان كل واحد اختار طريق وهو بس اللي هيتحمل عواقب اختياره.مش انت بس اللي صح والباقي غلط.ومش انا بس اللي صح والباقي غلط
ومش احنا اللي هنحاسب الناس،احنا بكدة بنحط نفسنا في مكانة اعلي بكتير من مكانتنا و اعلي بكتير من مقدرتنا
المهم انا برضه لسة ماوصلتش لاجابة لسؤالي الأساسي،احنا ليه بقينا كدة؟فكروا مع نفسكوا يمكن تبقوا اذكي مني و توصلولها