ماتحكمش علي الناس بالمظاهر..لا ولاهي

انا واحدة من الناس اللي اتربوا من صغرهم علي انهم مايحكوموش علي الناس بالمظاهر.و اننا مش المفروض ابدا اتعامل مع الناس او حتي انظرلهم بطريقة مختلفة بناء علي عدد العربيات اللي عندهم او رصيدهم في البنك مثلا
يعني انا كنت في المدرسة معايا اللي بيجي بعربية متفيمة و هيئة سياسية و معايا اللي بيجي في الباص زيه زي بقية الناس. و معايا اللي ابوه معرفش مين واللي خالها صاحب ايه بس ماكنش الموضوع بيفرق معايا ولا حسيت انه اصلا بيفرق مع حد لغاية ما احتكيت بالحياة الواقعية
لقيت ان معايير الحكم علي الناس في مجتمعنا مش زي ما انا فاهمة خالص.الموضوع مش بمبادئ واخلاق البني ادم والكلام ده. الموضوع ب "هو معاه عربية ايه؟" و "وهو اسم باباه ايه؟"."طيب هم بيأجروا في مارينا ولا عندهم حاجة هناك؟" واسئلة زي ديه يعني.
و الموضوع ده بقي بيبان اوي اوي في الجواز او النسب. يعني يسعده يهناه اللي اتولد في عيلة تقدر تجيبلوا عربية مفيش منها غير تلاتة في البلد وابوه اسمه بيطلع في الجرنان كل يومين(حتي لو بسبب عدم تسديده لقروض البنوك)،ياسلام يبقي عريس لقطة.
حتي الولاد بقوا بيفكروا كدة.مفيش بقي اللي عايز زوجة وفية وتخلي بالها من الولاد و الكلام ده، ديه حاجات ثانوية.تيجي بعد ان يكون باباها رجل اعمال مشهور و هيظبطوا في بداية حياته العملية. ده غير ان كل الناس هتحسدوا انوا وصل لوحدة زي ديه بغض النظر عن هي شخصيا مين و لا بتعمل ايه في حياتها
كل الحاجات ديه خلتني اتسأل يعني انا لو كان بدل ما عندي اب مهندس اكتشف_علي رأي عادل امام في فيلم عمارة يعقوبيان_ان البلد ديه مش محتاجة مهندسين، عندي اب رجل اعمال مشهور جدا مش عارفة طبيعة عمله بالظبط (ومش هاقول عليه حرامي)لكن غناه الفاحش اللي كان في خلال عشر سنين بس حواليه شكوك و علامات استفهام.و بدل ما عندي ام اخدت قرار ان هي تقضي بقيت حياتها في خدمة اولادها وجوزها،عندي ام سيدة مجتمع معروفة(مش هقول عليها مش كويسة ولا حاجة)بس علشان تثبت انها هاي كلاس لبسها و تصرفاتها معظم الناس بتستغربها
المشكلة الاكبر ان مبقاش فئة واحدة بس من المجتمع (اللي هم المفروض من وجهة نظري السطحيين)هم اللي بيحكموا علي الناس بالمعايير ديه.ده معظم فئات المجتمع بقت كدة.حتي اللي منهم انا شخصيا باحترمهم جدا و باحترم عقليتهم.
انا شخصيا لو هتسألوني انا راضية عن نفسي .يعني بحكم الطريقة اللي اتربيت بيها.لكن بصراحة مخبيش عليكوا انا في الظروف ديه و الحاجات اللي بشوفها حواليا في مجتمعنا بقيت بتسأل 100مرة في اليوم هو انا صح ولا غلط؟!معرفش احكموا انتوا