في رمضان اللي فات كنت في يوم معزومة عند واحدة صحبتي. لاقيت أختها بتتطبخ آكل غير اللي إحنا هناكله عشان هتنزل توزعه علي الناس اللي في الشارع قبل المغرب تفطر بيه
عجبتني الفكرة و قعدت ساعدتها و قبل الإفطار اخذنا الحاجة و نزلنا
أنا كنت مبسوطة أوى و حاسة أن أنا بعمل حاجة كويسة و حسيت أن أنا راضية عن نفسي في اللحظة ديه
واحنا ماشيين بالعربية شوفنا واحدة قاعدة في الشارع و معاها طفلين. إحنا صعب علينا الأطفال الصغيرة فقلنا نديها علبة من اللي معانا. فجأة_ و ماتفهمش دول طلعوا منيين_ اتلم علينا حوالي عشر بني آدميين كبار و شباب و عيال صغيرة، رجالة و ستات. بقوا يخبطوا علي العربية و يمدوا أيديهم جوة العربية علشان يلحقوا يخدوا أي كان اللي احنا بنوزعوا. و الآكل اللي كنا عمالين نغرفوا بعناية اعدوا يتخنقوا عليه و يضربوا بعض لغاية ما بهدلوا العلب بالأكل اللي جواها. احنا أتخضينا لاننا مكناش متوقعين كدة ابدا. و شوفنا عربيات تانية عملت نفس اللي احنا عملناه و حصلهم نفس اللي حصلنا
فجأة أحساسي باني راضية عن نفسي و السعادة اللي كنت فيها اللي كانت المفروض ناتجة عن مساعدة الآخرين اختفت.و زي ما اكون حسيت بالّذنب لأني كنت فاكرة اني كدة بساعدهم.ده غير ان نظرة واحدة ست منهم ليا و هي بتمدلي ايديها مش قادرة انساها لغاية دلوقتي.ماكنتش نظرة امتنان بالعكس ديه كانت بتبصلي زي ما اكون انا السبب في الغلب اللي هي فيه.عامة انا برده مش هاعرف أوصفها
انا مابقتش عارفة المفروض يصعبوا عليا ولا لأ.هم المسئولين عن اللي هم فيه ولا أحنا اللي واخدين أكتر من حقنا ولا هو كل واحد بياخد نصيبه في الدنيا وخلاص
اللي وصلتلوا بعد تفكير ان الناس ديه مش اللي محتاجاه ان حد يديهم لقمة ولا اتنيين جنيه في ايديهم.و مش علشان افتكرناهم في يوم يبقي ده يدينا الحق ان احنا نبقي راضيين عن نفسنا بقيت السنة
الناس ديه محتاجة اللي اكتر من كدة بكتير.محتاجة اللي يدافع عن حقوقهم و يمدلهم ايد المساعدة مش بس بقرشيين.الناس ديه محتاجة حد يعلمهم و يفهمهم ان حياتهم ممكن تبقي احسن من كدة و ان ليهم حقوق مش واخدينها.الناس ديه من حقهم علينا ان احنا نبقي عقلهم اللي بيفكر و لسانهم اللي بيطالب بحقوقهم الضايعة
أنا مش بروج لأفكار أشتراكية ولا حاجة.صحيح الاشتراكية بتنادي بتوزيع عادل للثروة بس برده الليبرالية بتنادي بإتاحة فرص عادلة أمام الجميع لبناء حياة كريمة. و أحنا بقي ولا عندنا ده ولا ده
انا ما بقولش ان الدافع علشان نساعد الجهلة والفقراء من عامة الشعب لازم يبق نابع من ولائنا لأفكارنا الأيديولوجية ولا حتي نابع من طيبة قلوبنا،ده الدافع الحقيقي لازم بقي يكون نابع من أقتناعنا ان الحقد الطبقي و الكره تجاه الطبقة الاعلي_اللي في رأي مبرر_لو فضل يغلي جوة الناس ديه،في يوم كدة هيطلعوا علينا يكلونا بأيديهم و أسنانهم.بالظبط زي ما حسيت أنه هيحصلنا أنا وأصحابي يومها.و بصراحة ماتقدرش تلومهم.أنا صحيح ما جربتش قبل كدة بس بيتهايئلي أن الواحد لما يقرصوا الجوع و يبقي من فقروا مش لاقي يجيب عيش حاف لازم يتوحش و يهبش في اللي مش حاسس بيه اللي بيرمي الأكل من كتره
